Үтүөлээх учуутал М.Е. Охлопкова уонна норуодунай суруйааччы Д.К. Сивцев-Суорун Омоллоон 1967 сыллаахха оҥорбут букубаардара Саха сирин үөрэҕириитин устуоруйатыгар биир бастыҥ кинигэнэн биллэр. Бу үөрэх кинигэтэ 1972 сылтан саҕалаан XXI үйэ онус сылларыгар диэри хас да көлүөнэ маҥнайгы кылаас үөрэнээччилэригэр ааҕарга, суруйарга үөрэтэргэ олук буолбута. Бастакы тахсыбыт букубаарга ойуулары аатырбыт худуоһунньук А.Н. Осипов уруһуйдаабыта. Үөрэх кинигэтэ 1972 с. Монреаллааҕы, 1975 с. Москватааҕы Аан дойдутааҕы кинигэ быыстапкаларыгар ситиһиилээхтик кыттыбыта, анал дьупулуомунан наҕараадаламмыта.