Үгэс буолбут «Саха ыалын халандаара» сылын ахсын сонунун-нуомаһын хомунан, сэһэнин-сэппэнин кэккэлэтэн, үгүһү кэпсээри, күннэтэ ыйан-кэрдэн биэрээри мааны ыалдьыт буолан, үгүс ыал алаһа дьиэтигэр киирэн кэлэр.

Сылтан-сыл халандаар сонуна, билиҥҥи олоххо сөп түбэһиннэрэн, норуокка туһалаах, көдьүүстээх буоллун, саха санаатын көтөхтүн, билбэтин сэһэргээтин, истибэтэҕин сипсийдин, кыл да түгэнэ кыһалҕаттан аралдьыттын, сөхтөрө, үөрдэ эрэ турдун диэн кыһаллан таҥабыт, кэпсээнэ хатыламматын курдук, кичэйэн оҥоробут. Нэһилиэнньэ бары араҥатыгар — эр дьоҥҥо да, дьахталларга да, эдэрдэргэ да, эмэннэргэ да интэриэһинэй буоллун диэн сонунун наардыыбыт. Ол курдук быйылгы халандаарга саха итэҕэлин кылгас өйдөбүллэрэ, күннээҕи түбүктэргэ сүбэлэр, айымньылартан быһа тардыылар, түүр омук минньигэс аһын ырысыаптара, умнуллубут саха тылларын суолталара, араас омук тылын ытыс саҕа тылдьыта, сулустар тугу кэпсииллэрэ, үһүйээннэр, номохтор, алгыстар, таабырыннар, оҕо толкуйдуур дьоҕурун сайыннарар дуобат садаачалара, сорудахтар о.д.а. таҥыллан киирдилэр.

Саҥа сыл — саха халандаарынан Үрүҥ Айыы сыла, Илиҥҥи халандаарынан — Сылгы сыла эһиэхэ үтүөнү эрэ түстээтин, чөл туругу, баай-байылыат олоҕу, дьолу-соргуну аҕаллын диэн алгыс тылбытын тиэрдэбит!

Үүммүт сыл бэлиэ күнүн хроникатын СӨ Национальнай бибилэтиэкэтин библиограба С.Р. Николаева, дуобат садаачаларын гроссмейстер Г.Г. Колесов бэлэмнээтилэр.

Халандаар таһын Фёдоров А.С. алгысчыт хаартыската (Виктор Ли-Фу түһэриитэ) киэргэттэ.