«Сыл кинигэтэ: СИБИРЬ-ЕВРАЗИЯ-2025»

Күндү ааҕааччыларбытыгар, кинигэни сөбүлээччилэргэ үөрүүлээх сонуммутун үллэстэбит!

Сэтинньи 21 күнүгэр «Книжная Сибирь» бэстибээл чэрчитинэн «Сыл кинигэтэ: СИБИРЬ-ЕВРАЗИЯ-2025» норуоттар икки ардыларынааҕы куонкурус кыайыылаахтарын уонна призердарын наҕараадалааһын үөрүүлээх тэрээһинэ ыытылынна.

Бу күрэхтэһиигэ Арассыыйа араас эрэгийиэннэриттэн барыта 211 бырайыак кыттыыны ылла. Быйыл «Айар» кыһа хас да кинигэнэн араас номинацияҕа кыттан, икки сүрүн кыайыыны ылла!

1) «Бастыҥ уус-уран литература» номинацияҕа интэриниэт-куоластааһын лауреата – Александр Амбросьев-Сайылык Уола «Аарыма» диэн литературнай-уус-уран айымньытын иһин үрдүк ааты ылла!

2) «Улуу Кыайыы 80 сылыгар анаммыт бастыҥ таһаарыы» номинацияҕа «Якутия на защите Отечества = Саха сирэ Аҕа дойду көмүскэлигэр. 1941–1945» диэн кинигэ-альбоммут кыайыылаах буолла! 🕊

Национальнай кинигэ кыһатын аатыттан бары ааҕааччылары, кинигэ ааптардарын уонна кэллиэгэлэрбитин үрдүк таһымнаах кинигэ куонкуруһугар кыайыылаах аатын ылбыппытынан эҕэрдэ!