Суруналыыс, суруйааччы Б.И.Павлов-Борис Кэм “Өйбөр туппут куоратым” диэн арамаанын 1-кы түһүмэҕин сүрэхтэниитэ буолан ааста

Национальнай библиотека историческай саалатыгар өтөр-наар бачча элбэх киһи мунньустубута суоҕа. Өрөбүл күн диэбэккэ литератураны уонна Борис Кэм айымньытын сэҥээрээччилэр тоҕуоруһа мустубуттар.

Борис Иванович саҥа кинигэтин баара-суоҕа сыл аҥарын иһигэр суруйан бүтэрбитэ. Бу кинигэ икки кыһа – “Айар” уонна “Көмүөл” кыттыгас таһаарыылара. Арамаан маҥнайгы аата “Почтальон” диэн этэ. Ону сүбэлэһэн баран “Өйбөр туппут куоратым” диэн уларытан ааттаабыппыт. Туох да саарбаҕа суох Борис Павлов саҥа арамаана – саха билиҥҥи литературатыгар сонун көстүү буолар уонна Борис Кэм суруйааччы быһыытынан сиппитин-хоппутун туоһулуур айымньы.

“Айар” кыһа салайааччыта А.В.Егоров бэйэтин этиитигэр “Айымньы биир уратыта манна элбэх параллелизм баар. Ол эбэтэр биир айымньыга хас да кэм, хас да көлүөнэ дьон ойууланан көстөллөр. Арыт 20-с үйэ бүтүүтэ көстөр, арыт 20-с үйэ саҥата, эмиэ саха омук дьылҕатыгар былдьаһыктаах кэмнэр көстөллөр. Бу араас кэмнэри көрдөрөрүгэр ааптар айымньы тутулун ыспакка, барытын дьүөрэлээн, ытаһалаан киллэртээбитэ олус кэрэхсэбиллээх. Маны мин суруйааччы сатабыла дии саныыбын. Борис Кэм бу айымньытыгар саха бастакы уонна саха билиҥҥи интеллигенцияларын тэҥнии, дьүөрэлии тутан көрдөрбүтэ ураты уонна олус интэриэһинэй” диэн бэлиэтээтэ уонна арамаан иккис чаааһа сурулла охсоругар баҕарда.

Айымньыга аҕыйаҕа суох былыргы номохтор, үһүйээннэр киирбиттэр, саха сиэрэ-туома, майгыта-сигилитэ үчүгэйдик көрдөрүллүбүт. Манна, бэл диэтэр, саха дьоно тумус туттар киһибит Мандар Уус кытары бэйэтин миэстэтин ылбыт.

Ааптар саҥа кинигэтин ырытыытын литературовед С.Ноева оҥордо. Борис Кэми биир кэмҥэ үөрэммит үөлээннээхтэрэ Е.Лугинов, В.Луковцев-Дьурустаан, П.Пермяков-Тэлэкэ, А.Копырин, “Кэм” сурунаал актыыба, “Сэргэлээх уоттара” түмсүү, И.Шамаев, А.Гуринов, үлэтин саҕалаабыт Чурапчы улууһун дьоно-сэргэтэ, биир дойдулаахтара, аймах-билэ дьоно итиитик-истиҥник эҕэрдэлээтилэр, айымньы туһунан бэйэлэрин санааларын үллэһиннилэр. Кинигэ биһирэмин 90-с сыллардаахха ыччат дьон кутун туппут “Дуораан” бөлөх солистара Бүөккэ Бөтүрүөп, Николай Прокопьев уонна ырыаһыт Н.Баишев-Дархан киэргэттилэр.

Борис Кэм айымньыны суруйарга уустуктар бааллар эрээри, үлэлииргэ интэриэһинэйин, дойдуга тосту уларыйыылардаах 90-с сыллар, ити кэмнээҕи көлүөнэлэр уонна саха бастакы интеллигенциятын тустарынан уус уран айымньыны суруйар баҕалаах үлэлээбитин туһунан эттэ.

Бу сонун айымньыны “Айар” кыһа бары лааппыларытттан атыылаһыаххытын сөп. Сыаната – 650 солк.