Саха тылын, литературатын уонна култууратын учууталларын үһүс өрөспүүбүлүкэтээҕи сийиэһэ

Сэтинньи 26 күнүгэр Саха тылын, литературатын уонна култууратын учууталларын III өрөспүүбүлүкэтээҕи сийиэһин чэрчитинэн С.Н. Донской-II аатынан Үөрэҕи сайыннарар уонна идэни үрдэтэр институкка учууталлары кэпсэтиигэ муста. Сүрүн ырытыы тиэмэтэ «Орто уонна үрдүкү сүһүөххэ аналлаах сахалыы үөрэх кинигэлэрин, босуобуйаларын, иитэр-үөрэтэр матырыйааллары туһаныы».

«Айар» кыһабыт үөрэх уонна оҕо кинигэтин киинин үлэһиттэрэ көхтөөх кыттыыны ыллылар. Киин салайааччыта Марина Георгиевна Никифорова 5-11 кылаастарга саха тылын, литературатын уонна култууратын уруоктарыгар туттуллуон сөптөөх эбии матырыйааллары, кинигэлэри, оонньуулары, биллэрэр-көрдөрөр таһаарыылары билиһиннэрдэ. Кини кыһа үлэтин, оҕолорго аналлаах сонун айымньылары, ону тэҥэ учуутал үлэтигэр көмөлөһөр босуобуйалары сырдатта.

Эрэдээктэр Сардана Тимофеева "«Айар» кыһа уонна өрөспүүбүлүкэ иитээччилэрэ ситимнээх үлэлэрэ" диэн тиэмэнэн уһуйаан иитээччилэригэр аналлаах билиһиннэрии оҥордо. Кини "Айар" кыһа иитээччилэри кытта хайдах бииргэ үлэлиирин, саҥа бырайыактары айарын, оҕолорго анаан хаачыстыбалаах матырыйааллары таһаарарын кэпсээтэ.

Оттон эрэдээктэр Карина Оконешникова "Алын суһүөххэ аналлаах сахалыы үөрэх кинигэлэрин, босуобуйаларын, иитэр-үөрэтэр матырыйааллары туһаныы" аналлаах түһүлгэҕэ кыттыыны ылла. Кини оҕону саха тылыгар уһуйар, ааҕарга-суруйарга үөрэтэр методическай босуобуйалар уонна кинигэлэр суолталарын ыйда.

Бу сийиэс саха тылын, литературатын уонна култууратын сайдыытыгар, оҕолорбутун төрүт тылбытыгар үөрэтиигэ улахан суолталаах. «Айар» кыһа бу үлэҕэ инники күөҥҥэ сылдьан, кэлэр көлүөнэбит сайдыытыгар бэйэтин кылаатын киллэрэр.

---