Саха суругунан литературата 125 сыллаах үбүлүөйэ!

Ахсынньы 2 күнүгэр П.А. Ойуунускай аатынан Саха академическай тыйаатырыгар саха суругунан литературата 125 сыллаах улуу үбүлүөйүгэр анаммыт киэҥ далааһыннаах дьоро киэһэ буолла!

Бу бэлиэ кэм айар тылбыт аҕата Өксөкүлээх Өлөксөй «Байанай алгыһа» айымньыта суруллубут сылыттан ааҕыллар. Үйэлэр кирбиилэригэр ийэ тылбыт сайдарыгар, омукпут өйө-санаата уһуктарыгар, кэскилбит кэҥииригэр төрүт литературабыт бигэ тирэх буолбута уонна күн бүгүҥҥүгэ диэри бу үрдүк аналын утумнаахтык толоро сылдьар. Ол кэмтэн ыла саха литературата улахан суолу ааспыта.

Тыйаатыр саалатыгар литература төрүттээччилэрин сыдьааннара: Лариса Кулаковская, Елена Слепцова-Куорсуннаах, Люция Сивцева, Никита Мординов, Вера Данилова, Любовь Данилова, Кюннэй Тарасова уонна да атыттар, биллиилээх суруйааччылар, ааҕааччылар кыттыыны ыллылар.

Саха сирин Суруйааччыларын сойууһун бэрэссэдээтэлэ Наталья Харлампьева саха литературатын устуоруйатын, оруолун, суолтатын туһунан киэҥ ис хоһоонноох дакылаатынан саҕалаата. Бэйэтин эҕэрдэтин Ил Түмэн бэрэссэдээтэлин солбуйааччы Александр Жирков, бырабыыталыстыба бэрэссэдээтэлин солбуйааччы Сергей Местников, култуура миниистирэ Афанасий Ноев эттилэр. Оттон Арассыыйа Суруйааччыларын сойууһун сэкиритээрин солбуйааччы Геннадий Иванов эҕэрдэлээн туран, бэйиэт буоларын быһыытынан, хоһоонун аахта.

«Айар» салайааччыта Август Васильевич Егоров, кини солбуйааччыта Валерий Луковцев уонна бас эрэдээктэр Марина Макеева кыттыыны ыллылар. Август Егоров үбүлүөйүнэн ис сүрэхтэн эҕэрдэлээтэ. Кини: «Литература, суруйааччы, кинигэ кыһата – быстыспат, биир кэлим ситимнээхтэр. Ол иһин Арассыыйа үрдүнэн 26 национальнай эрэгийиэнтэн биһиги Саха сирэбит «Саамай ааҕар эрэгийиэн» үрдүк аатын сүкпүтэ! Бу – биһиги суруйааччыларбыт, библиотекаларбыт, кинигэ кыһатын үлэһиттэрин уонна ааҕааччыларбыт барыбыт биир сомоҕо ситиһиитэ!» – диэн бэлиэтээтэ.

Үөрүүлээх быһыыга-майгыга Август Егоров Наталья Харлампьеваҕа махтал суругу уонна кэрэ сибэкки дьөрбөтүн туттарда.

Бу үбүлүөй Саха норуотун тылын уонна култууратын күүһүн, сайдыытын, суруйааччылар сомоҕолоһор дьулуурдарын кэрэһэлиир!