СӨ култууратын миниистирэ Афанасий Ноев «Айар» кыһа үлэһиттэрин кытта көрүстэ

Сахабыт литературатын уонна бэчээтин сайдыытыгар сүҥкэн кылааты киллэрэр «Айар» национальнай кинигэ кыһата быйыл 100 сыллаах үбүлүөйүн бэлиэтиир. Бу ураты түгэн чэрчитинэн Саха Өрөспүүбүлүкэтин култууратын миниистирэ Афанасий Ноев кыһа коллективын кытта көрүстэ.

Саха сиригэр кинигэ кыһата 1926 сылтан төрүттэммитэ. Ол курдук, партия обкомун бюротун кулун тутар 2 күнүнээҕи, онтон кэлин Саха АССР Норуодунай Комиссардарын Сэбиэтин от ыйын 30 күнүнээҕи уураахтарынан судаарыстыбаннай кинигэ кыһата (Якутиздат) тэриллибитэ. Ол кэмтэн ыла кинигэ кыһата саха норуотун тылын-өһүн, култууратын, устуоруйатын үйэтитэн, билиҥҥи кэмҥэ тиийэ биир бигэ тирэҕинэн буолар.

Көрсүһүү кэмигэр СӨ култууратын миниистирэ Афанасий Ноев «Айар» кыһата Саха сирин култууратын, духуобунаһын сайдыытыгар улахан суолталаах тэрилтэ буоларын тоһоҕолоон бэлиэтээтэ. Кини кыһа өр сыллаах үлэтэ, төрөөбүт тылынан кинигэ таһаарыыга сүдү оруола хаһан да умнуллубатын эттэ.

Миниистири кытта кэпсэтиигэ, «Айар» кыһа салайааччыта Август Егоров уонна кыһа үлэһиттэрэ, быйылгы 2026 сыл — СӨ Култуура сыла буоларын учуоттаан, үбүлүөй тэрээһиннэрин бигэргэттилэр. Сыл устата ыытыллыахтаах тэрээһиннэри тула кэпсэтии таҕыста, ону тэҥэ ааҕааччыны элбэтиигэ, эдэр ыччаты култуураҕа, литератураҕа сыһыарарга туһуламмыт санаа атастаһыыта ыытылынна.

Кыһа салалтата уонна үлэһиттэрэ 100 сыллаах үбүлүөйдэрин чэрчитинэн, саха норуотун баай литературатын киэҥник тарҕатарга, эдэр ыччаты ааҕыыга уһуйарга, саха тылын күүһүн уонна кэрэтин көрдөрөргө анаммыт элбэх араас дьаһаллары былааннаабыттар. Бу быйылгы култуура сылыгар литературабыт, төрөөбүт тылбыт сайдарыгар бука бары сомоҕолоһон үлэлиирбит үтүө түмүктэри аҕалыа диэн эрэнэбит.

---