«Ньырбакаан удьуора Омолдоон» сэһэн автограф-сиэссийэтэ

Алтынньы 1 күнүгэр «Бичик+» кинигэ маҕаһыыныгар саха литэриирэтин эйгэтигэр дьоһуннаах түгэн буолан ааста. Биллиилээх суруйааччы, ааҕааччылар куттарын туппут Дмитрий Пономарев-Дьолуолаах саҥа «Ньырбакаан удьуора Омолдоон» сэһэнин биһирэмэ, автограф-сиэссийэтэ уонна ааптары кытта көрсүһүү буолла. Тэрээһин улахан сэҥээриини ылан, маҕаһыын иһэ толору дьонунан туолла, олорор миэстэ тиийбэккэ, сорохтор туран эрэ сылдьан көрдүлэр-иһиттилэр.

Бу күн кинигэ тула истиҥ кэпсэтии, санаа атастаһыыта таҕыста. Былырыын ааптар «Ньырбакаан» диэн арамаана тахсан, дьон интэриэһин тардан, түргэнник атыыланан бүппүтэ. Оттон бу сырыыга тахсыбыт айымньы – Ньырбакаан удьуора Омлодоон туһунан. 

Суруйааччы бэйэтэ да этэринэн, бу айымньыны устуоруйа чахчыта диир табыллыбат – ханнык да докумуонунан кини бигэргэммэт. Ол эрээри, бу номохтор – биһиги баай култуурабыт. Өбүгэлэрбит олохторун туһунан быһылааннаах кэпсээннэр норуот тылынан уус-уран айымньытыгар тиһиллэн, уостан уоска бэриллэн, үйэлэри уҥуордаан тиийэн кэллэхтэрэ. Дьолуолаах бу номохтору саҥаттан тилиннэрэн, сурукка-бичиккэ тиһэн хаалларар улахан соругу ылынна.

 

Тэрээһин суолталаах ыалдьыттарынан «Айар» кыһа бэрэстэбиитэллэрэ буоллулар. Кыһа салайааччытын солбуйааччыта Валерий Луковцев айымньы туһунан дириҥ ырытыыны оҥордо. Ааҕааччы киэҥ араҥатыгар туһуламмыт эрэдээксийэ сэбиэдэссэйэ Надежда Андросова кыһа аатыттан махтал суругу уонна бэлэҕи туттарда.

Маны таһынан сэргэхсийиини, оонньууну биэрэр бириистээх викторина ыытыллан, дьон үөрүүтэ өссө үрдээтэ. Мустубут ыалдьыттар илии тутуурдаах, өттүк харалаах бардылар. Ол курдук, Аан дойдутааҕы Аҕам саастаахтар күннэрин көрсө кинилэргэ кыра бэлэхтэр туттарылыннылар. 

Тэрээһин бүтүүтэ аһаҕас микрофон бэриллэн, кэлбит дьон эҕэрдэ тыл эттилэр, сэмэй бэлэхтэри туттардылар. Саамай кэтэһиилээх түгэнинэн автограф-сиэссийэ буолла – ааҕааччылар ааптар илии баттааһыннаах кинигэни тутан хааллылар.

«Ньырбакаан удьуора Омолдоон» сэһэни «Айар» кинигэ бары маҕаһыыннарыттан эбэтэр интэриниэт-маҕаһыынтан 10 быраһыан чэпчэтиилээх атыылаһыахха сөп. Оттон «Ньырбакаан» арамааны «ЛитАйар» сыһыарыыттан булан ааҕыахха сөп.

 

Күндү ааҕааччылар, бу дьоро киэһэни биһигини кытары бииргэ атаарбыккытыгар ис сүрэхтэн махтал! Эһиги баар буолаҥҥыт, маннык иэйиилээх көрсүһүүлэр олоххо киирэллэр. Өссө да иннибитигэр үгүс көрсүһүүлэр, тэрээһиннэр күүтэллэр!

Тэрээһинтэн хаартыскалары бу сигэнэн киирэн көрүҥ: https://vk.ru/album-211136311_312021501