Наталья Михалева-Сайаны кытта көрсүһүү

Ыам ыйын 26 күнүгэр, Ырыа күнүн чэрчитинэн, «Бичик+» маҕаһыын истиҥ эйгэтигэр Саха норуодунай суруйааччыта, бэйиэт Наталья Михалева-Сайаны кытта «Ырыа-хоһоон түһүлгэтэ» диэн иһирэх көрсүһүү буолан ааста.

Көрсүһүү «Барыта баар этэ...» дэн ураты суолталаах ырыанньык тула ыытылынна. Бу хомуурунньук икки сыллааҕыта Наталья Владимировна үбүлүөйүн көрсө тахсыбыта. Ырыанньыкка Сахабыт сирин 54 биллиилээх мелодиһын Сайа 78 хоһоонугар айбыт ырыалара киирбитэ. Ырыанньык биир сүрүн уратыта — кинигэҕэ QR куодунан 139 аудио уонна 23 видеоклип киирбитэ. Онон хас биирдии ааҕааччы ырыалары истэр, видеокилииптэри көрөр, фонограммалары холбоон тэҥҥэ ыллаһар кыахтаммыта.

Көрсүһүү устата Сайа саҥа хоһооннорун аахта, айар үлэтин сырдатта, санааларын ааҕааччыларыныын үллэһиннэ. Маны тэҥэ ырыа буолбут хоһоонноругар видеокилииптэри көрдөрөн, мустубут дьон сүрэҕин сылаанньытта.

Көрсүһүүгэ СӨ култууратын туйгуна, Арассыыйа Бэдэрээссийэтин үтүөлээх учуутала, оһуохайдьыт Евдокия Ефимова-Элиэ Орто Халыматтан көтөн кэлэн, кинигэҕэ киирбит «Сүрэҕим эйиэхэ тардыһар» диэн Сайа хоһоонугар ырыатын бэлэхтээн, тэрээһини ордук киэргэттэ.

Түмүккэ мустубут дьон Сайаҕа сылаас тыллары эттилэр, сибэкки дьөрбөтүн, бэлэхтэрин ууннулар. Бу күн дьон олус истиҥник, аһаҕастык кэпсэтиигэ кыттан, Сайа кинигэлэрин ылан, илии баттатан, үөрэн-көтөн тарҕастылар.