Мандар Уус - саха норуотун култууратын үйэлээх илдьитэ

Мандар Уус үбүлүөйдээх тэрээһинэ

Бүгүн, ахсынньы 10 күнүгэр, норуот уһулуччулаах маастара, П.А. Ойуунускай аатынан Судаарыстыбаннай бириэмийэ лауреата, Саха сирин Духуобунаһын академиятын академига, култуура үтүөлээх үлэһитэ, Таатта улууһун бочуоттаах гражданина Борис Федорович Неустроев-Мандар Уус 80 сааһын бэлиэтиир «МАНДАР УУС – саха норуотун култууратын үйэлээх илдьитэ» диэн үтүө тэрээһин «Үлэ кыбаартала» Креативнай кластерга ыытылынна. Манна Борис Федорович олоҕун аргыһын Федора Борисовнаны кытта Таатта Баайаҕатыттан кэлэн, тэрээһиҥҥэ кытынна, дьонун-сэргэтин кытта көрүстэ, норуотугар махтанна, санаатын сайа эттэ.

Мандар Уус үөрүүтүн үллэстэ «Үлэ кыбаарталыгар» дьон тоҕуоруһа муһунна. Манна «Мандар Уус олоҕо» хаартыска быыстапката, «Мандар Уус кэпсиир» кинигэ быыстапката, норуот уус-уран оҥоһуктарын атыыта-тутуута, «Уус сэһэнэ» диэн уустар истиҥ көрсүһүүлэрэ буоллулар. Ону тэҥэ Г.Д. Никонов режиссердаах «Мандар Уус» диэн Борис Федорович олоҕун, айар үлэтин сырдатар кэрэхсэбиллээх киинэ биһирэмэ ыытылынна.

Үөрүүлээх тэрээһин аһыллыытыгар СӨ Бырабыыталыстыбатын Бэрэссэдээтэлэ К.Е. Бычков, СӨ Бырабыыталыстыбатын бэрэссэдээтэлин солбуйааччы С.В. Местников, Дьокуускай куорат аҕа баһылыга Е.Н. Григорьев, Таатта улууһун баһылыга А.С. Бурцев уонна Баайаҕа нэһилиэгин баһылыга А.Р. Романов тыл эттилэр. Салгыы буолбут «Маастар сэһэнэ» көрсүһүүгэ «Айар» кыһа салайааччыта А.В. Егоров Мандар Ууһу исиҥник эҕэрдэлээтэ уонна саҥа тахсыбыт «Мандар Уус» кинигэтин, «Ойуу тылбыт. Айыы тылбыт» аккырыыкка кэмпилиэгин үөрүүлээх быһыыга-майгыга туттарда.

«Айар» кыһаҕа Мандар Уус үгүс кинигэтэ бэчээттэнэн тахсыбыта, дьон-сэргэ биһирэбилин ылбыта, араас таһымнаах күрэхтэргэ ситиһиилэммитэ. Холобур, «Саха ойуута-бичигэ» кинигэтэ 2022 с. Арассыыйаҕа култуура сылын түмүгүнэн «Кыһыл көмүс» наҕарааданы ылбыта, ону таһынан Астанаҕа ыытыллыбыт V Евразийскай кинигэ быыстапкатыгар «Культура уонна искусство» номинацияҕа 2 истиэпэннээх дьупулуомунан наҕараадаламмыта. Бу – Мандар Уус айымньылаах үлэтин улуу суолтатын дакаастыыр!

Билигин атыыга «Саха быһаҕа» альбом-кинигэтэ баар. Манна саха быһаҕын эйгэтэ, үөрэтиллиитэ, уратыта, оҥоһуллуута, көрүҥэ дириҥник бэриллэр. Ону тэҥэ олоҕун устата хомуйбут маска, туоска, таҥаска, көмүскэ түһэр ойуута-бичигэ түмүллэн, наарданан «Ойуу тыла, Айыы тыла» аккырыыкка кэмпилиэгэ күн сирин көрдө.

Оттон саҥа тахсыбыт «Мандар Уус» диэн кинигэтэ бэрт сотору кэминэн атыыга тахсыа, ааҕааччыларга тиийиэ. Бу таһаарыыга Борис Федорович дьиэ кэргэнин, биир дойдулаахтарын, үөлээннээхтэрин, алтыспыт дьонун-сэргэтин ахтыылара, ырытыылара түмүллэн киирдилэр. Кинигэ кини айылҕаттан бэриллибит ураты дьоҕурун, айыылартан аналын, барҕа талаанын, эгэлгэ өрүттээх, өр сыллаах үтүө түмүктэрдээх үлэтин, алгыстаах санааларын арыйар ис хоһоонноох.

Мандар Уус үлэлэрэ – саха норуотун олоҕун, култууратын, духуобунаһын бигэ тирэҕэ. Кини үйэлэргэ хаалар сүдү суолталаах үлэтэ кэнэҕэски ыччакка саҥа саҕахтары арыйа, ситиһиилэргэ сирдии турдун!