«КЭМ КЭРДИИ УОННА КИҺИ» – ВАЛЕРИЙ НИКОЛАЕВИЧ ЛУКОВЦЕВ 65 СААҺЫН ҮБҮЛҮӨЙДЭЭХ КӨРСҮҺҮҮТЭ!

Ахсынньы 22 күнүгэр Саха Өрөспүүбүлүкэтин Национальнай бибилэтиэкэтин устуоруйа саалатыгар Саха сирин киэҥ нэлэмэн култууратын, бэчээтин эйгэтин сырдатааччы, «Айар» кыһа салайааччытын солбуйааччыта, биллэр суруйааччы, суруналыыс, тылбаасчыт, уопсастыбанньык – Валерий Николаевич Луковцев-Дьурустаан 65 сааһыгар анаммыт «Кэм кэрдии уонна киһи» диэн сэргэх, сылаас, элбэх дьон кыттыылаах көрсүһүү үрдүк таһымнаахтык буолан ааста.

Бу дьоро тэрээһини Саха Өрөспүүбүлүкэтин Ил Дарханын сүбэһитэ, СӨ үтүөлээх юриһа, Михаил Федоров аатынан Судаарыстыбаннай бириэмийэ лауреата Игорь Игнатьевич Николаев иилээн-саҕалаан ыытта. Кини Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын дьаһалтатын салайааччыта Г.Н. Михайлов аатыттан махтал суругу туттарда.

Дьиктитэ баар: көрсүһүү Максим Кирович Аммосов төрөөбүт күнүгэр ыытылынна. Валерий Николаевич эдэр эрдэҕиттэн көхтөөх уопсастыбанньык, саха чулуу уолаттарын ааттарын үйэтитиигэ дьаныардаахтык үлэлэспитэ. Ону таһынан, ый үүнэр, кутуйах хаамыытынан күн уһуур, сырдыыр кэмигэр түбэһиитэ эмиэ ураты дьылҕаны кэрэһилиир.

Тэрээһини «Айар» кыһа салайааччыта, доҕоро Август Егоров аан тылынан арыйда. Салгыы бэйэлэрин эҕэрдэлэрин тиэртилэр:

• Ил Түмэн сис кэмитиэтин бэрэссэдээтэлэ Елена Голомарева;

• СӨ култуураҕа миниистирин солбуйааччы Мария Турантаева;

• «СӨ наукаларын акадьыамыйата» судаарыстыбаннай тэрилтэ төрүт тыллары үөрэтэр, харыстыыр уонна сайыннарар киин салайааччытын солбуйааччыта, педагогика билимин кандидата Светлана Семенова, биир куурустааҕа Альберт Кельциев;

• Саха сирин Суруйааччыларын сойууһун бырабылыанньатын бэрэссэдээтэлэ, норуот бэйиэтэ Наталья Харлампьева;

• Саха итэҕэлигэр, төрүт өйүгэр-санаатыгар дириҥ чинчийиилэрдээх бөлүһүөк, билим дуоктара Андрей Саввинов уонна СӨ Тыл сайдыытыгар управление салайааччыта Римма Жиркова.

• М.К. Аммосов аатынан Хотугулуу-Илиҥҥи бэдэрээлинэй университет Хотугу норуоттар тылларын уонна култууратын үнүстүүтүн дириэктэрэ Гаврил Торотоев;

• ЯГСХА доцена, наука кандидата, устудьуон кэминээҕи тириэньэрэ Александр Иванов;

• «Ситим Медиа» бөлөх салайааччыта Мария Христофорова;

• Төрөөбүт нэһилиэгиттэн Баайаҕаттан, Таатта Тыараһатыттан, Таатта түмсүүтүттэн, ону сэргэ Намтан, Ньурбаттан, маны таһынан Чурапчы Чакырын баһылыга Константин Лебедев видео-сибээс нөҥүө эҕэрдэлээтилэр.

  

Валерий Николаевич аймах-билэ дьоно-сэргэтэ, биир үөлээннээхтэрэ, үгүс сылларга алтыспыт, бииргэ үлэлээбит кэллиэгэлэрэ, айар үлэтин сэргээччилэр, сэҥээрээччилэр үөрүүтүн үллэһиннилэр, истиҥ махталларын тириэртилэр.

Бу кэпсэтиигэ кыттыспыт, санааларын үллэстибит дьоҥҥо барҕа махталбытын тиэрдэбит!

Валерий Николаевич, айар үлэҕэр саҥа ситиһиилэри, чэгиэн доруобуйаны, дьолу-соргуну баҕарабыт! Саха норуотун туһугар үлэҥ өссө даҕаны салҕана турдун!

---