«Айыылартан айдарыылаахтар, өбүгэлэртэн көҥүллээхтэр»

«Арчы дьиэтэ» айылгы киинигэр «Сандаар» диэн айылҕаттан айдарыылаахтар түмсүүлэрэ тэриллибитэ 20 сылын көрсө «Айыылартан айдарыылаахтар, өбүгэлэртэн көҥүллээхтэр» кинигэ бэчээттэнэн тахсан, ыам ыйын 19, 20, 21 күннэригэр автограф-сиэссийэтэ ыытылынна. Бу кинигэҕэ Саха сирин ойууннара, удаҕаттара, көрбүөччүлэрэ, норуот эмчиттэрэ, түүлдьүттэрэ, билгэһиттэрэ, алгысчыттара удьуор утумтан ситимнээхтэрин, эттэтии эрэйин хайдах ааспыттарын, дьоннорун-сэргэлэрин туһугар тургутуулаах үлэлэрин туһунан кэпсэнэр.

Тэрээһиҥҥэ кэлбит дьон айылҕалаах дьону кытта атах тэпсэн олорон кинигэ, көстүбэт эйгэ тула ирэ-хоро кэпсэтэн, хаартыскаҕа түһэн үөрэн-көтөн тарҕастылар.

Ыам ыйын 19 күнэ. Максим Дуранов - Чаҕылыһы кытта көрсүһүү.

Бу күн көрбүөччү, норуот эмчитэ Максим Максимович Дуранов - Чаҕылыс ыалдьыттаата. Кини сиһилии арчыланыы, ыраастаныы, харысхал туһунан кэпсээтэ, ыалдьыттар долгутар боппуруостарыгар эппиэттээтэ, сүбэ-ама биэрдэ. Максим Максимович харысхалы таба туттууга маннык сүбэлээтэ:

Ыам ыйын 20 күнэ. Альбина Саввинова - Кыталыынаны уонна Афанасий Павлов - Күндүмэнэ кытта көрсүһүү.

Көрбүөччү, уйулҕаһыт Альбина Николаевна Саввинова - Кыталыынаны уонна уйулҕаһыт, ичээн, илбииһит Афанасий Афанасьевич Павлов - Күндүмэни кытта олус умсугутулаах көрсүһүү буолан ааста. Бэйэлэрин уопуттарын, билиилэрин-көрүүлэрин үллэһиннилэр, ыалдьыттар долгутар ыйытыктарыгар толору хоруйдары биэрдилэр.

Афанасий Павлов - Күндүмэн харысхал туһунан маннык сүбэлээтэ:

Альбина Николаевна - Кыталыына эмиэ куһаҕан энергияны утары харыстаныы туһунан интэриэһинэй санаатын үллэһиннэ:

Ыам ыйын 21 күнүгэр, Гуннара Ивановна Байгильдина - Ороһуунускайаны уонна Марина Петровна Попова - Уйгуну кытта көрсүһүү

Кинигэни хомуйан оҥорбут, бэчээккэ бэлэмнээбит, суруналыыс, Саха Өрөспүүбүлүкэтин бэчээтин туйгуна Гуннара Ивановна Байгильдина-Ороһуунускайа кинигэ оҥорон таһаарыы сүрүн санаатын толору арыйда.

Кини «Айыылартан айдарыылаахтар, өбүгэлэртэн көҥүллээхтэр» диэн сүдү үлэ хас биирдии киһиэхэ олох араас түгэннэригэр көмөлөһөр, сүбэлиир-амалыыр. Олоххо киирэр араас кыһалҕаҕа, ыйытыыга хоруйу, туруккун чөлүгэр түһэрэр ньымалары, өбүгэ үгэһин бу кинигэттэн булуохха сөп.

Киэһэ ураты ыалдьытынан сүллэрдьит Марина Петровна Попова - Уйгу буолла. Марина Петровна бэйэтин ураты дьоҕурун быһаарда:

Бу киэһэ өссө биир ыалдьыппыт – Ырыа күнүнэн сибээстээн, Саха Өрөспүүбүлүкэтин ырыа айааччыларын сойууһун чилиэнэ Зоя Данилова - Кэкэрдэ икки ырыанан эҕэрдэлээн соһуччу уонна олус истиҥ бэлэх буолла.

Ыалдьыттар үс күн устата кинигэ дьоруойдарыттан алгыс тыллаах автограф ылан, атах тэпсэн олорон кинигэ, көстүбэт эйгэ, өбүгэ үөрэҕин туһунан ирэ-хоро кэпсэтэн, хаартыскаҕа түһэн үөрэн-көтөн тарҕастылар. Кинилэр хас биирдии ыйытыыларыгар толору хоруй ылан сөхтүлэр-махтайдылар.

Маннык курдук истиҥ, дириҥ ис хоһоонноох көрсүһүүлэр «Айарга» өссө да буолуохтара. Сахалыы тыыннаах тэрээһиннэргэ көхтөөх кыттыыны ыла тураргытыгар ыҥырабыт! Билиигэ-көрүүгэ тардыһыыбыт хаһан да умуллубатын!