«АЙЫЫЛАРТАН АЙДАРЫЫЛААХТАР, ӨБҮГЭЛЭРТЭН КӨҤҮЛЛЭЭХТЭР»

Муус устар 16 күнүгэр Дьокуускай куорат «Арчы дьиэтэ» Айылгы киинигэр саха норуотун сиэрин-туомун, өбүгэ үгэһин уонна айдарыылаах дьон үтүө үлэтин түмэр улахан тэрээһин — «Айыылартан айдарыылаахтар, өбүгэлэртэн көҥүллээхтээр» кинигэ биһирэмэ үрдүк таһымнаахтык ааста.

Бу кинигэ «Арчы дьиэтин» иһинэн үлэлиир «Сандаар» айдарыылаахтар түмсүүлэрэ тэриллибитэ 20 сылыгар анаан таҕыста. Кинигэ ис хоһооно дириҥ: билиҥҥи норуот эмчиттэрэ, көрбүөччүлэр, ичээннэр, отоһуттар, илбииһиттэр, уйулҕаһыттар, билгэһиттэр, алгысчыттар удьуор утумтан ситимнэрин, эттэтии эрэйин хайдах ааспыттарын уонна дьоннорун-сэргэлэрин туһугар тургутуулаах үлэлэрин туһунан кэпсэнэр. Кэрэхсэбиллээх матырыйааллары хомуйан, түмэн, таҥан, суруналыыс Гуннара Байгильдина - Ороһуунускайа бэчээккэ бэлэмнээбитэ.

Тэрээһини алгысчыт, норуот эмчитэ Анисья Старостина - Сайыы Кута аал уоту оттон алгыһынан саҕалаата. Ол кэннэ «Арчы дьиэтин» дириэктэрэ Лариса Андреева, «Сандаар» түмсүү салайааччыта, доруобуйа харыстабылын үлэһитэ, уйулҕа үөрэхтээҕэ Юлия Николаева-Намылҕа эҕэрдэ истиҥ тылларын эттилэр, айылҕалаахтар Максим Дуранов, Татьяна Захарова-Татыйык, Афанасий Павлов-Күндүмэн, Анисья Старостина-Сайыы Кута, Бүөтүр Чахов-Бойуот дьон-сэргэ болҕомтотун тардар туһалаах сүбэлэрин-амаларын биэрдилэр. Саалаҕа толору мустубут ыалдьыттар ураты дьарыктаах дьон ааттарын ытыктаан, өбүгэ үгэһин үйэтитэр бу улахан хардыыны үөрэ-көтө көрүстүлэр.

Хомуурунньук «Айар» кыһанан таҕыста. Тэрээһиҥҥэ кыһа салайааччыта Август Егоров уонна ааҕааччы киэҥ араҥатыгар анаммыт таһаарыылар эрэдээксийэтин сэбиэдэссэйэ Надежда Андросова кытыннылар.

Август Егоров

«Бу кинигэ тахсан өссө элбэх киһи айылҕаттан айдарыылаахтарбыт тустарынан сиһилии билэн, билсэн, инникигэ, кэскилгэ, олоххо эрэллэрэ өссө күүһүрүө, доруобуйаларын бөҕөргөтүнүөхтэрэ турдаҕа. Итини сэргэ, бу таһаарыы төрүт өй-санаа, сиэр-майгы, итэҕэл сайдыытыгар эмиэ күүс-көмө буолуо дии саныыбын» диэн бэлиэтээтэ.

Оттон «Арчы дьиэтэ» киин бастакы дириэктэрэ Надежда Толбонова:

«Сандаар» — биһиги үлэбитигэр саамай төһүү күүс буолбут түмсүү. Кинилэр үлэлэрин суолтата бу кинигэҕэ арыллар»

диэн тоһоҕолоон эттэ.

Ону тэҥэ бу кинигэ ааҕар, билсэр эрэ суолталаах буолбатах — эмтээх, харысхаллаах бэлэх буолар. Түмсүү салайааччыта, норуот эмчитэ, көрбүөччү, билгэһит Ю.Ю. Николаева-Намылҕа анаан ииппит, кинигэ таһыгар баар, харысхала олоххутугар ыарахаттары көрүстэххитинэ күрүөлүөҕэ, ыарыйдаххытына эмтиэҕэ.

Биһирэмҥэ анаан аҕалыллыбыт кинигэлэр тутатына атыыланнылар, сорох дьон тиксибэтилэр — таһаарыыны дьон сэргээбитин, сэҥээрбитин туоһулуур. Сүрүн тираж «Айар» маҕаһыыннарыгар атыыга таҕыста.

«Айыылартан айдарыылаахтар, өбүгэлэртэн көҥүллээхтэр» — өбүгэбит билиитин үйэтитэр, норуот эмчиттэрин уопутун түмэр күндү бэлэх.