«Айар» национальнай кыһа төрүттэммитэ 100 сылын бэлиэтээтибит!

Балаҕан ыйын 11 күнүгэр Ю. Гагарин аатынан култуура уонна ускуустуба киинигэр 100 сыллаах үбүлүөйбүтүн бэлиэтээтибит. Бу тэрээһиммит чэрчитинэн Саха сирин Ил Дарханыттан өрөспүүбүлүкэ норуоттарын тылларын харыстыыр, сайыннарар сыаллаах өр сыллаах үлэбитин сыаналыыр Махтал суругун тутаммыт, үөрүүбүт үгүс.

1926 сылтан саҕалаан бу күҥҥэ диэри 20 тыһыынчаттан тахса араас, 79 мөлүйүөнтэн тахса экземпляр кинигэ сахалыы уонна аҕыйах ахсааннаах хотугу норуоттар тылларынан бэчээттэнэн таҕыста.

Билигин кыһабыт кинигэни эрэ буолбакка, сахалыы тыыннаах таҥаһы, сувенир уонна оонньуу арааһын оҥорон таһаарар тэрилтэҕэ кубулуйда.

«Биһиги миссиябыт — кэлэр көлүөнэҕэ тылбытын-өспүтүн, култуурабытын, үгэспитин тиэрдии. Манна кинигэ, литература эрэ буолбакка, араас формат көмө буолар», — диэн салайааччыбыт Август Васильевич бэлиэтиир.

Ол курдук, ааспыт сыл бүтүүтэ араас бырайыактарбытыттан биирдэстэрэ «ЛитАйар» үлэлээн саҕалаабыта. Бу 800-тэн тахса сахалыы, нууччалыы, аҕыйах ахсааннаах хотугу норуоттар тылларынан электроннай уонна аудио-кинигэлээх мобильнай сыһыарыы буолар. Манна классик уонна билиҥҥи кэм суруйааччыларын уус-уран айымньылара, оҕоҕо аналлаах кинигэлэр, олоххо-дьаһахха туһалаах уо.д.а. таһаарыылар киирэ сылдьаллар. Ону таһынан «Айар. Академия» үөрэх тэрилтэлэрин үлэһиттэригэр үтүмэн көмөлөөх саайпыт күнтэн күн аайы сайдар.

Үбүлүөйбүтүгэр Казахстан Өрөспүүбүлүкэтин үтүөлээх диэйэтэлэ, биллиилээх суруйааччы, Саха сирин туһунан бастакы казахтыы тылынан тахсыбыт кинигэ ааптара Алибек Асылбаевич Аскаров, Москваттан Арассыыйа кинигэ таһаарааччыларын ассоциациятын бэрэсидьиэнэ Константин Васильевич Чеченев, Башкортостантан «Китап» кинигэ кыһатын салайааччыта Эльмира Иршатовна Хайритдинова уонна Новосибирскайтан, Саха сирин араас улуустарыттан бочуоттаах ыалдьыттар кэлэн эҕэрдэлээтилэр.

Дьокуускайдааҕы култуура уонна ускуустуба колледжын «ЭЙГЭ» норуодунай тыйаатыра «Саха — бастыҥ ааҕар омук» композициятынан, сөбүлүүр артыыстарбыт Анатолий Бурнашев, Лэгэнтэй, Екатерина Захарова, Герман уонна Клавдия Хатылаевтар, «Виртуозы Якутии» ансаамбыл уонна Дьокуускай куораттааҕы национальнай гимназия 2-с кылааһын үөрэнээччилэрэ дьоро киэһэни киэргэттилэр.

Бу киэһэ кыһа 100 сыллааҕы устуоруйатын туһунан документальнай киинэ быһа тардан көрдөрүлүннэ. Толору киинэни «Саха» НКИХ ханаалыгар эбэтэр «Саха сирин кинигэтин кыһата. 100» диэн үбүлүөйдээх кинигэбитигэр баар QR-сигэнэн киирэн көрүөххүтүтүн сөп.

Араас сылларга Арассыыйатааҕы уонна норуоттар икки ардыларынааҕы куонкурустарга улахан наҕараадалары ылбыт кинигэлэр быыстапкалара тэрилиннэ, СӨ Национальнай бибилэтиэкэтэ «Вековой путь якутской книги» диэн дьоһун быыстапканы туруорда.

«АЙАР УУСТАР» колледж устудьуоннара «Айар. Таҥас» бренд таҥастарын кэтэн, «Күһүҥҥү долгураҥ» диэн уобарастары дьүһүйэн дефилелээн хаамтылар.

Бары кэлбит ыалдьыттарбытыгар сылаас-истиҥ тылларгыт иһин махталбыт муҥура суох. Бырааһынньыктааҕы киэһэбитин тэрийсибит дьоммутугар-сэргэбитигэр, чуолаан режиссерга Айдыс Черноградскайга, режиссер-сценаристка Мария Гаврильевна Боппоеноваҕа, диктордарга Мария Кимҥэ, Роман Алексеевка, Национальнай бибилэтиэкэ кэлэктиибигэр, Дьокуускайдааҕы култуура уонна ускуустуба колледжын уонна «АЙАР УУСТАР» колледж үлэһиттэригэр, устудьуоннарыгар, Ю. Гагарин аатынан култуура уонна ускуустуба киинин кэлэктиибигэр, барҕа махталбытын тиэрдэбит.

Өссө да уһун үйэлэргэ Айардыын сайдыыны саҕыаҕыҥ!