«Айар» кыһа үрдүк ситиһиилэри оҥордо!

«Айар» национальнай кинигэ кыһата Бүттүн Арассыыйатааҕы АСКИ «Лучшие издания по истории и современному развитию национальных культур народов России и интеграции в общероссийский культурный процесс» диэн улахан күрэххэ үрдүк ситиһиилэри оҥордо! Бу күрэх Арассыыйаҕа норуоттарын биир сомоҕо сылыгар ананна.

Түөрт ый устата сайаапкалары тыыран, 80-ча кыһа икки сүүсчэ кинигэни ыыппытыттан, «Айар» кинигэ кыһата дьоһуннаах миэстэлэри ылла. Муус устар 25 күнүгэр Элистаҕа буолбут наҕараадалааһын сиэригэр-туомугар биһиги кыһабыт быһа холбонон иһиттэ!

Биһиги ситиһиилэрбит:

1) «Билии-көрүү литературатыгар бастыҥ таһаарыылар» («Лучшие издания познавательной литературы») номинацияҕа:

• «Саха литературатын көмүс кылаата» — «Золотой фонд якутской литературы» кинигэтэ шорт-листы таба охсон, 75 таһаарыыттан бастыҥ алта кинигэ кэккэтигэр киирдэ

• Розалия Бравина «Саха төрүт олоҕо» — «Традиционный уклад жизни народа саха» диэн кинигэтинэн, Арассыыйа Судаарыстыбаннай Думатын Национальностар дьыалаларын кэмитиэтинэн Махтал суругунан бэлиэтэннэ. Бу — саха норуотун култууратын киэҥник тарҕатыыга оҥорбут кылааппыт сыанабыла.

2) «Бастыҥ альбомнар уонна фото-альбомнар» («Лучшие альбомы и фото-альбомы») номинацияҕа:

• «Материальная и духовная культура народов Якутии в музеях мира» кинигэбит Анал дипломунан наҕараадалаатылар.

3) «Оҕолорго уонна эдэр ыччакка бастыҥ таһаарыылар» («Лучшие издания для детей и юношества») номинацияҕа:

• «Тымныы оҕуһа» — «Бык холода» диэн оҕолорго аналлаах кинигэбитин Арассыыйа норуоттарын тылларын Федеральнай института Анал дипломунан бэлиэтээтэ!

Бу ситиһиилэр Сахабыт сирин кинигэтин, култууратын үйэтитиигэ, кэскилин түстээһиҥҥэ биһиги кыһабыт дьоһуннаах оруоллааҕын көрдөрөллөр. Инникитин даҕаны Пятигорскай, Ханты-Мансийскай, Уфа, Казань курдук куораттарга уонна Москва «Красная Площадь» кинигэ бэстэбээлигэр дипломнаах кинигэлэрбитибитин билиһиннэриэхпит. Сиһилии — http://aski.ru/ru/news/id-2186/

Бу — биһиги барыбыт, саха норуотун, ситиһиитэ! Күндү дойдулаахтарбыт, Арассыыйа киэҥ киэлигэр төрөөбүт култуурабытын таһаарарбытынан киэн туттабыт!