«Айар» кыһа Татарстан Өрөспүүбүлүкэтин дэлэгээссийэтин кытта көрүстэ



Дэлэгээссийэни Татарстан Судаарыстыбаннай Сэбиэтин бэрэссэдээтэлин солбуйааччы Марат Ахметов салайан кэлбит. Дэлэгээссийэ састаабыгар – уобалас структураларын сүрүн бэрэстэбиитэллэрэ бааллар: Үөрэх, култуура, наука уонна национальнай боппуруостар кэмитиэтин бэрэссэдээтэлэ Айрат Зарипов, Ил Сүбэ дьокутаата Илшат Аминов, үөрэх уонна наука миниистирэ Илсур Хадиуллин.

Үлэ чэрчитинэн Саха сирин суруйааччыларын сойууһун уонна «Айар» национальнай кыһа бэрэстэбиитэллэрин кытта улахан көрсүһүү буолла. Бу тэрээһин уопут атастаһыы эрэ буолбакка, эрэгийиэннэр икки ардыларынааҕы култуура ситимнэрин бөҕөргөтөр, литературнай уонна култуура саҥа саҕалааһыннарын сайыннарар муоста буолла.

«Айардар» көрдөрүүгэ киэҥ быыстапканы бэлэмнээбиппит, онно араас кинигэлэри: оҕо литературатыттан, уус-уран прозаттан саҕалаан үөрэх-методическай пособиеларга уонна саха култууратын баайын туһунан ыйынньыктарга тиийэ туруордубут. Ыалдьыттар таһаарыылары кытта эрэ билсибэккэ, бэлэмнэммит сувенир оҥоһуктар уонна остуол оонньууларын көрдүлэр. 

Ордук генеральнай директор А.В. Егоров кыһа үлэтин, миссиятын уонна сайдыытын кэскилин туһунан кэпсээнин сэҥээрдилэр.

Ону тэҥэ, «Айар» төрүт тылга, култуураҕа тапталы кинигэ нөҥүө эрэ буолбакка, оонньуулар, оонньуурдар, сувенирдэр уонна таҥастар нөҥүө эмиэ көхтөөхтүк тарҕатарын, иҥэрэрин туһунан иһитиннэриини сэҥээрэн иһиттилэр. Уонна сотору кэм «ЛитАйар» диэн мобильнай сыһыарыыны үлэҕэ киллэрии былааннанар, онно “Айар” кинигэлэрэ уонна таһаарыылара киэҥ ааҕааччыга тиийимтиэ буолуохтара, ол култуура эйгэтин сыыппараҕа көһөрүүгэ өссө биир хардыы буолуоҕа. 

Бу көрсүһүү Татарстан уонна Саха сирин култуураҕа уонна үөрэхтээһиҥҥэ бииргэ үлэлэһиилэрин сайдыытыгар улахан суолталаах кэрдиис кэм буолар. Билиини уонна санааны атастаһыы төрүт тыллары, литератураны уонна үгэстэри харыстыырга уонна тарҕатарга туһуламмыт бииргэ үлэлиир бырайыактарга олук уурда.

---