«АЙАР» КЫҺА «КЫҺЫЛ БОЛУОССАККА»: САХА КИНИГЭТЭ ДОЙДУ ТАҺЫМЫГАР!

Москва куоракка бэс ыйын 4-7 күннэригэр дойду сүрүн литературнай тэрээһинэ, XII «Кыһыл болуоссат» кинигэ бэстибээлэ, быйылгы Арассыыйа норуоттарын сомоҕолоһуутун сылыгар сүүһүнэн кыһаны, суруйааччылары, дизайнердары, библиотека үлэһиттэрин уонна күнүн аайы болуоссаты толору ааҕааччылары, кинигэни таптааччылары түмтэ. Саха сириттэн быйыл 100 сыллаах үбүлүөйүн бэлиэтиир «Айар» кыһа, үгэс быһыытынан, үрдүк таһымҥа кытынна.

Кыһа экспозицията «Арассыыйа эрэгийиэннэрэ» павильоҥҥа түөрт күн устата саҥа таһаарыылары, оҕо кинигэлэрин, араас оонньуулары, сувенирдары, Саха сирин норуоттарын култууратын, литературатын нэһилиэстибэтин, духуобунай баайын сырдатар бородууксуйатын билиһиннэрдэ.

Салайааччы Август Егоров, кини солбуйааччыта Валерий Луковцев, эрэдээксийэ сэбиэдиссэйэ Надежда Андросова, эрэдээктэр Алина Бурцева уонна атыы менеджерэ Надежда Иванова кытыннылар. Дэлэгээссийэ бэстибээл тэрээһиннэригэр, кинигэ биһирэмнэригэр, идэлээх көрсүһүүлэргэ уонна Арассыыйа кинигэ эйгэтин бэрэстэбиитэллэрин кытта кэпсэтиилэргэ көхтөөхтүк кытынна.

Кыһыл болуоссакка биир чаҕылхай түгэнинэн Саха норуодунай бэйиэтэ Наталья Харлампьева автобиографическай сэһэнин «Дьэҥкир сурук» («Прозрачное письмо») биһирэмэ буолла. Быйыл «Слово» диэн Арассыыйа национальнай куонкуруһун бириэмийэтинэн бэлиэтэммит айымньы нууччалыы уонна сахалыы бэчээттэнэн таҕыста. Тылбаасчыт кыһа эдэр үлэһитэ Анжелика Эверстова. Дьоһун биһирэми Арассыыйа суруйааччыларын сойууһун сэкирэтээрин солбуйааччы Геннадий Иванов иилээн-саҕалаан ыытта.

Үөрүүлээх тэрээһиҥҥэ СӨ бастайааннай бэрэстэбиитэлин солбуйааччы Мария Сафонова, «Молодая гвардия» кыһа салайааччыта, сүрүн эрэдээктэрэ Мария Залесская, «Смена» сурунаал сүрүн эрэдээктэрэ Михаил Кизилов уонна Горнай улууһун баһылыга Никита Андреев кыттан истиҥ эҕэрдэ тылларын тириэртилэр.

Элбэх дьон тоҕуоруһа мустан, сэргээн-кэрэхсээн үөрүүлээх түгэни киэргэттилэр! Биһирэм кэнниттэн автограф-сессияҕа ааҕааччылар Наталья Ивановналыын кэпсэтэн, кинигэ ылан илии баттатан, астынан тарҕастылар.

Биһиги кыһабыт айымньыларын, литературатын, Саха норуотун баай култууратын киэҥ араҥаҕа билиһиннэрбитин иһин үгүс махтал тылын уонна наҕараадалары ылла.

1) «Арассыыйа норуоттарын устуоруйатын уонна култууратын тарҕатыыга киллэрбит кылаатын иһин» үрдүк махтал суругунан бэлиэтэннибит.

2) Арассыыйа Федерациятын национальнай кинигэ таһаарыытын сайыннарыыга улахан кылаатын иһин, Арассыыйа Федерациятын Хотугу, Сибиир уонна Уһук Илин олохтоох аҕыйах ахсааннаах норуоттарын тылларын харыстааһыҥҥа, сайыннарыыга уонна тарҕатыыга кылаатын иһин «Бык холода» кинигэбит дипломунан наҕараадаланна

Кыһа салайааччыта Август Егоров Арассыыйатааҕы кинигэ таһаарааччыларын ассоциацията (АСКИ) тэрийбит эрэгийиэннээҕи кыһалар салайааччыларын конференциятыгар кытынна. Кыттааччылар кинигэ таһаарыытын сайыннарыы, национальнай литературалары өйөөһүн уонна Арассыыйа норуоттарын култуураларын элбэх араас көрүҥүн харыстааһын туһунан сүрүн боппуруостары дьүүллэстилэр.

XXXVI Бүтүн Арассыыйатааҕы АСКИ «Сыл бастыҥ кинигэлэрэ» күрэһин түмүгүнэн кыһа «Национальнай литературалары уонна кинигэ таһаарыытын сайыннарыыга уонна тарҕатыыга кылаатын иһин» диэн АСКИ уонна Арассыыйа библиотечнай ассоциациятын анал дипломунан «Саха литературатын көмүс кылаата» бырайыагын иһин бэлиэтэннэ. Быйылгы күрэс Арассыыйа 57 эрэгийиэниттэн 120-тэн тахса кинигэ таһаарааччылары түмтэ, кинилэр 700-тэн тахса таһаарыыны көрдөрдүлэр.

Өссө биир дьоһуннаах ситиһиинэн сыллата ыытыллар Норуоттар икки ардыларынааҕы «Кинигэ ойуута» («Образ книги») күрэскэ кыайыы буолла. Кыһабыт худуоһунньуга Светлана Красильникова Андрей Титаров «Хардаачча Бэргэн» кинигэтин уус-уран оҥоһуутун иһин «Оҕолорго уонна эдэр ыччакка анаммыт айымньыларга бастыҥ ойуулар» диэн номинацияҕа дипломунан наҕараадаланна!

Быйыл «Айар» «Кыһыл болуоссат» бэстибээлгэ уон биирис төгүлүн кыттан, Саха сирин дойду сүрүн кинигэ былаһааккатыгар дьоһуннаахтык билиһиннэрдэ, идэлээх ситимнэри бөҕөргөтөн уонна ыалдьыттарга өрөспүүбүлүкэбит баай литературнай уонна култуурунай нэһилиэстибэтин кытта билиһиннэрдэ.