«Айар» күннэрэ Мэҥэ Хаҥалас улууһугар ыытылынна

Кулун тутар 4 күнүгэр Мэҥэ Хаҥалас улууһугар «Айар» национальнай кинигэ кыһатын күнэ үрдүк таһымнаахтык ааста. Кинигэ кыһатын салайааччыта Август Егоров, кини солбуйааччыта Валерий Луковцев, анал бырайыак уонна сакааһынан таһаарыы салаатын салайааччыта, сүрүн эрэдээктэри солбуйааччы Акулина Стручкова уонна талааннаах суруйааччы Василий Гоголев - Уйулҕан састааптаах дэлэгээссийэ улуус дьонун-сэргэтин кытта истиҥник көрсүстэ.

Түмсүүлээх уонна ааҕар Мэҥэ Хаҥалас улууһа кинигэни таптыырынан, ааҕар култуураны өрө тутарынан биллэр. 2025 сыл түмүгүнэн «Айар» кыһа сыл бастыҥнарын тэрээһинигэр «Саамай ааҕар улуус» диэн үрдүк ааты иккистээн ылбыта (урут 2023 сыллаахха эмиэ бу аакка тиксибитэ), кырдьык даҕаны киэн туттуулаах аат. Оттон Мэҥэ нэһилигиттэн төрүттээх суруйааччы Уйулҕан «Хамначчыт кыыс дьылҕата» кинигэтэ «Ааҕааччы биһирэбилэ» номинация кыайыылааҕынан буолан, айымньылара ааҕааччылар биһирэбиллэрин ылбытын туоһулаабыта.

Тэрээһин Аллараа Бэстээххэ улуус дьаһалтатын кытта көрсүһүүттэн саҕаланна. Манна кинигэ кыһата уонна Мэҥэ Хаҥалас улууһа бииргэ үлэлэһэр туһунан сөбүлэсиһиигэ илии баттаһыы буолла. Көрсүһүүгэ улуус баһылыгын бастакы солбуйааччыта Гаврил Толстяков, улуус култуураҕа, духуобунай сайдыыга салалтатын салайааччыта Анна Исакова уонна дьаһалта үлэһиттэрэ кытыннылар.

Салгыы Майа сэлиэнньэтигэр улуустааҕы кииннэммит библиотекаҕа тэрээһиннэр салҕаннылар. Улуустааҕы библиотека дириэктэрэ Марианна Никанорова уонна оҕо библиотекатын сэбиэдиссэйэ Ольга Дьяконова иилээн-саҕалаан ыыппыт көрсүһүүлэригэр «Айар» үлэтин сырдатыы, саҥа таһаарыылары билиһиннэрии буолла. Ону тэҥэ, «Саамай ааҕар дьиэ кэргэн», «Бастыҥ ааҕааччы» уонна «Бастыҥ ааҕар оҕо» номинациялар кыайыылаахтарыгар туоһу суруктар туттарылыннылар.

Онтон педагог, музыкаҕа уһуйааччы, мелодист Капиталина Семенова «Ойуур остуоруйалара» кинигэтин сүрэхтэниитэ ыытылынна. Оҕолор уонна үлэһиттэр кинигэ остуоруйаларынан инсценировка көрдөрөн мустубут дьону сөхтөрдүлэр. Итини таһынан, атыы-эргиэн быыстапката тэриллэн, ааҕааччылар сөбүлүүр кинигэлэрин, бэлэхтэри, сувенирдары атыыластылар.

«Айар» тэрэһиннэрин түмүктүүр чааһа Балыктаах нэһилиэгин култуура киинигэр буолла. Манна суруйааччы Уйулҕаны кытта көрсүһүү уонна айар үлэтин тула кэпсэтии ыытылынна. «Мэҥэ нэһилиэгэ» тыа сирин түөлбэтин баһылыгын солбуйааччыта Иван Мохначевскай, библиотека үлэһитэ Сардаана Трифонова көрүстүлэр. Көрсүһүүгэ эрдэттэн тэриллэн ыытыллыбыт күрэхтэр түмүктэрэ тахсан, кыайыылаахтар үөрүүлэрэ үксээтэ.

• «Айардыын ааҕабыт» уруһуй күрэҕэр 18 оҕо кытынна. Бастакы миэстэ – Маша Попова, М.П. Габышев аатынан Балыктаах орто оскуолатын 4 кылаас үөрэнээччитэ. Иккис миэстэ – Ярик Сотников, М. 3 кылаас үөрэнээччитэ. Үһүс миэстэ – Данил Лихонди, 2 кылаас үөрэнээччитэ.

• ««Айар» («Бичик») кинигэлэрин сөбүлээн ааҕабыт» хаартысканан күрэххэ 12 дьиэ кэргэн көхтөөхтүк кытынна. Саамай элбэх кинигэни аахпыт бастыҥ дьиэ кэргэнинэн Сардаана Степановна уонна Дмитрий Гаврильевич Стручковтар дьиэ кэргэннэрэ ааттаннылар.

• Олохтоох библиотека аатыттан Татьяна Михайловна Андросова саамай элбэх кинигэни уларсан аахпыт «Бастыҥ ааҕааччы» ааты ылары ситистэ.

Бу киэһэ бэрт сэргэхтик, истиҥник ааста. Олохтоох дьон кэлэн истэн-көрөн, кыһа үлэһиттэрин кытта кэпсэтэн, бэйэлэрин ыйытыыларын биэрдилэр, санааларын үллэһиннилэр. «Айар» үбүлүөйдээх сылыгар Мэҥэ Хаҥалас улууһугар ыыппыт бу тэрээһинэ ааҕыыны көҕүлээһиҥҥэ, кинигэни өрө тутууга олус суолталаах түгэнинэн буолла.

Мэҥэ Хаҥалас дьонугар-сэргэтигэр кинигэни таптыыргыт, ааҕар култуураны сайыннараргыт иһин барҕа махталбытын тиэрдэбит! Эһиги көхтөөх буолуугут, кинигэҕэ убаастабыллаах сыһыаҥҥыт атын улуустарга холобур буолар. Үтүө көрсүһүүлэри, саҥа кинигэлэри уонна үтүө түмүктэри күүтэбит!