🎉 «АЙАР» КИНИГЭ КЫҺАТЫН 100 СЫЛЛААХ ҮБҮЛҮӨЙЭ! 🎉

От ыйын 30 күнүгэр С.А. Новгородов аатынан «Айар» кыһа 100 сыллаах үбүлүөйүн үөрүүлээхтик бэлиэтээтибит. Бу күн кыһабыт «БИЧИК+» маҕаһыыныгар ааҕааччылары, атыылаһааччылары, доҕотторбутун кытта бииргэ ыллыбыт.

Уонна бэс ыйын 12 күнүттэн от ыйын 26 күнүгэр диэри ыытыллыбыт «Айардыын 100 сыл бииргэ!» үбүлүөйдээх аахсыйа түмүгүн үөрүүлээхтик таһаардыбыт! Барыта 20 бириис оонньонно уонна 100 тыһыынча уу харчынан бириис.

Бырааһынньыгы кыһа салайааччыта Август Егоров арыйда. Бииргэ үлэлэһэр дьонун, ааптардары, ааҕааччылары уонна ыалдьыттары үйэлээх үбүлүөйүнэн эҕэрдэлээтэ уонна сүүс сыл тухары кыһа уонна саха тыла, литературата сайдарыгар кылааттарын киллэрбит бары дьоҥҥо махтанна.

Истиҥ эҕэрдэ тылын Саха сирин суруйааччыларын сойууһун бэрэссэдээтэлэ, норуотун бэйиэтэ Наталья Ивановна Харлампьева эттэ. Кини үбүлүөйүнэн эҕэрдэлээтэ, кыһа төрөөбүт тылы, култуураны уонна саха норуотун литературнай нэһилиэстибэтин харыстыырга улахан оруолун бэлиэтээтэ.

Бырааһынньык саамай долгутуулаах түгэннэриттэн биирдэстэрэ — кэлэр көлүөнэҕэ символическэй бэлэх биэриитэ буолла. Салайааччыбыт Дьокуускай куорат Саха гимназиятын үөрэнээччитигэр Дайаана Андросоваҕа 10 бастыҥ оҕо кинигэлэрин хомуурунньугун туттарда.

Дьиҥнээх бырааһынньыктааҕы түгэни «ЯкутИздат», «ЯкКнИздат», «БИЧИК», «АЙАР» диэн кинигэ кыһатын историческэй ааттарынан суруллубут кинигэ көрүҥнээх үбүлүөйдээх туорт киэргэттэ уонна хас биирдии баҕалаах хаартыскаҕа түһүөн сөптөөх тематическэй фотозона тэрилиннэ.

Үбүлүөйдээх аахсыйаҕа кыттыбыт, бырааһынньыкка кэлбит, быһа холбонуунан көрбүт хас биирдии киһиэхэ истиҥ махталбытын тиэрдэбит. Кинигэлэрбитин ааҕаргыт, бородууксуйабытын таларгыт уонна элбэх сыллар тухары «Айар» улахан дьиэ кэргэнин сорҕото буоларгыт иһин махтал!

100 сыл – бу кыһа эрэ устуоруйата буолбатах. Бу эһигини кытта бииргэ айар олохпут, дьылҕабыт устуоруйабыт! 💛📚