«Ааҕар эйгэ» кинигэ бэстибээлигэр «Айар» кыһа ситиһиилэннэ!

Ытык Рязань куорат Максим Горькай аатынан универсальнай научнай библиотекатыгар XI-с төгүлүн «Ааҕар эйгэ» национальнай кинигэлэр эрэгийиэннэр икки ардыларынааҕы бэстибээлэ үрдүк тэрээһиннээхтик ыытылынна.

***

Төһө даҕаны Саха сирин уонна Рязань ыккардыгар тыһыынчанан килэмиэтэр сыппытынан үрдүнэн, «Айар» кыһа бу бэстибээлгэ тэйиччиттэн олорон көхтөөх кыттыыны ылла.

***

Бэстибээл тутаах, киин түгэнинэн, үгэскэ кубулуйбут, киэҥ хабааннаах кинигэ быыстапкатын-дьаарбаҥката буолла. Манна дойду 9 эрэгийиэниттэн 64 кинигэ кыһалара кыттыыны ыллылар. Уонна «Сыл бастыҥ кинигэтэ» күрэх кыайыылаахтарыгар, лауреаттарыгар наҕараадалары туттардылар. Быйыл Дойду 40 эрэгийиэниттэн сайаапкаларын 80 кыттааччы ыыппыт. Бу сырыыга биһиги кыһабыт муҥутуур ситиһиилэнэн, хас да дьоһуннаах наҕарааданы ылары ситистэ!

***

1. «Ыччакка анаммыт» диэн номинацияҕа Арассыыйа Дьоруойа Андрей Григорьев олоҕуттан олоҕуран суруллубут «Тута» комикс-кинигэбит статуэткалаах иккис миэстэни ылары ситистэ!

2. «Эн Сахаҥ сирэ» кинигэбит «Эрэгийиэн кыраайын үөрэтии кыаҕын сайыннарыыга кылаатын иһин» диэн дьоһун номинацияҕа анал дьупулуомунан наҕараадаланна.

3. «Дьоруойдар кэмнэрэ» номинацияҕа «Стойкость куется на севере» уонна «Якутия на защите Отечества = Саха сирэ Аҕа дойду көмүскэлигэр: 1941-1945» диэн үйэлээх кинигэлэрбит анал дьупулуомнарынан бэлиэтэннилэр.

Бу наҕараадалар – биһиги үлэбит дьоһунун, суолтатын кэрэһэлииллэр! Бу ситиһиилэрбитинэн олус үөрдүбүт, долгуйдубут, уонна айар үлэбититтэн астынныбыт!