Киирии тылга улуус баһылыга Степан Саргыдаев Саха сирин аатын ааттаппыт биллэр судаарыстыбаннай диэйэтэллэр, биллиилээх суруйааччылар үбүлүөйдээх сылларын бэлиэтиир улахан тэрээһиннэр былааннаналларын сырдатта. Сайдыы балысханнык бара турар кэмигэр, олох тэтимин кытта тэҥҥэ хардыылаан кинигэни саҥардан, уһулуччу, киэн туттар, дьикти үчүгэй дьону үйэтитэ, айымньылаах үлэлэри сырдата туралларыгар кинигэ кыһатын үлэһиттэригэр махтанна.

"Улууска Ийэ сир сыла биллэриллибитэ. Бу чэрчитинэн тыа хаһаайыстыбатын, экология, дьиэ кэргэн хайысхаларыгар былааннаах үлэлэр ыытыллыахтара. Бүгүҥҥү сөбүлэҥ оҕону, ыччаты иитиигэ, сайыннарыыга улахан кылаат буолуоҕа диэн бука эрэллээхпин", - диэн бэлиэтээтэ.

Көрсүһүү түмүгүнэн, икки өттүттэн көдьүүстээх үлэни-хамнаһы тэрийэргэ, төрүт литэрэтиирэни, ускуустубаны, култуураны харыстааһыҥҥа, нэһилиэнньэҕэ кинигэ суолтатын үрдэтиигэ анаммыт сөбүлэҥҥэ улуус баһылыга Степан Саргыдаев уонна "Айар" кинигэ кыһатын гендириэктэрэ Август Егоров илии баттаатылар.

Сүрүн үлэнэн оҕолорго аналлаах С.А.Новгородов туһунан уус уран кинигэни таһаарыы буолуоҕа.

Маны таһынан Чурапчы улууһун Болтоҥо, Хадаар, Хоптоҕо нэһилиэктэригэр сылдьан кыһабыт үлэһиттэрэ нэһилиэнньэни кытта көрүстүлэр, суруйааччылар алтыстылар, кэпсэттилэр, “Бастыҥ ааҕааччы", "Бастыҥ ааҕар дьиэ кэргэн", "Бастыҥ эдэр ааҕааччы" анал ааттары туттардылар, кинигэ атыытын дьаарбаҥкатын тэрийдилэр.

Бииргэ үлэлиир кэллиэгэбитин Ольга Фролованы биир дойдулаахтара- Арыылаах нэһилиэгин олохтоохторо үөрэ-көтө көрсөн, "Арыылаах нэһилиэгин бочуоттаах олохтооҕо" диэн үрдүк ааты иҥэрэн ыыттылар. Санатан эттэххэ, Ольга Фролова-Янцен икки тылынан суруйар проза уонна поэзия жанрыгар үлэлэһэр эдэр суруйааччы, бу сылга Россия суруйааччыларын сойууһун чилиэнэ буолбута.