С.А. Новгородов аатынан “Айар” национальнай кыһа Ийэ тыл, сурук-бичик күнүгэр үгэс буолбут номинациялары туттарда.

Төрөөбүт тыл, уус-уран литература, национальнай кинигэ сайдыытыгар улахан көмөтүн иһин “Ийэ тыл, сурук-бичик сайдыытыгар дьоһун кылаатын иһин” диэн анал аат СӨ Ил Дарханыгар Айсен Сергеевич Николаевка ананна.
Айсен Сергеевич Саха сирин суруйааччыларын уонна аҕыйах ахсааннаах норуоттар литературалара бэчээттэнэригэр көрүллэр үп сарбыллыытын тус бэйэтинэн хас да төгүл чөлүгэр түһэртэрбитэ, быйыл 25 бырыһыан эптэрдэ. Киниэхэ суруйааччылар, ааҕааччылар ааттарыттан махтанан туран, биллиилээх скульптор Николай Чоччасов оҥорбут С.А. Новгородов статуэткатын туттардыбыт.

Ааспыт сыл түмүгүнэн кинигэни ааҕааччытын ахсаанынан, тарҕатыы, сакаас, библиотеканы кытта үлэ түмүгүнэн “Саамай ааҕар улуус” анал аатын Чурапчы улууһа сүктэ.
Улуус бэрэстэбиитэлигэр Оксана Васильевна Жирковаҕа анал статуэтканы уонна 30 тыһ. солк. “Айар” бородууксуйатыгар сертификат туттарылынна.

“Ийэ тыл, сурук-бичик туруу үлэһитэ” анал аат кыайыылааҕынан СӨ Суруйааччыларын сойууһун чилиэнэ, элбэх кинигэ ааптара, икки лит.түмсүүнү тэрийэн үлэлэппит, үгүс ааҕааччыны кэрэхсэппит “Сахалыы ыраастык саҥарыах” кинигэ ааптара, саха төрүт үгэһин, сиэрин-туомун тарҕатааччы Виктор Павлович Стручков-Дуулаҕа Дьуһаал буолла. Киниэхэ анал статуэтканан уонна харчынан бириэмийэнэн наҕараадаланна.

Бу үөрүүлээх тэрээһини олунньу 11 күнүгэр “Саха” НКИК канаалыгар "Талбан" биэриигэ көрүҥ!