Бу сырыыга биһиги өссө биир өр сылларга үлэлээбит бэтэрээн үлэһиппитин Гордеева Ульяна Терентьевнаны кытта көрсөн кэпсэттибит

1979-1982 сылларга корректор.
1982-2002 сылларга техническэй редактор. Бэчээт туйгуна, СӨ үөрэҕириитин туйгуна, Гражданская доблесть знак.

- Мин үлэлиир сылларбар кэлэктииппит суруйааччылартан, партийнай үлэһиттэртэн турара. 1979 сыллаахха терминнэри да билбэт эдэр оҕо үлэҕэ киирбиитим. Онуоха салалтабыт Москватааҕы полиграфическай техникумҥа үөрэттэрбиттэрэ, экзамен, зачет бөҕө туттарбыппыт. Үлэ да, сынньалаҥ да күөстүү оргуйар этэ. Автобуһунан Тааттаҕа Суорун Омоллоон музейыгар, Аммаҕа Саһыл Сыһыыга уонна да элбэх сирдэргэ сынньанан кэлбиппит. Бырааһынньыктарга стенгазета онорон таһаарар этибит. Шеметов диэн нуучча коллегабыт барыбытыгар шарж суруйан күллэртиир идэлээҕэ. Сайын, күһүн субуотунньуктуур этибит. Окко да, хортуоскаҕа да мэлдьи күлүү-оонньуу аргыстаах сылдьарбыт.
Бэчээт дьиэтэ саҥа тутуллан үлэҕэ киирэригэр буор, кумах, бетон таһан эмиэ үөрэ-көтө бары тэҥҥэ улэлэспиппит. Ол саҥа дьиэҕэ көһөн кэлбиппит олус да үөрүүлээх этэ! Эрэдээктэрдэр хаҥас кынакка олорор этилэр, онтон худуоһунньуктар, техническэй эрэдээктэрдэр, производство салаата биир өттүгэр баара. Дьэ, онно төттөрү-таары хаамыы-сиимии. Ол кэлиэгэбит Шеметов хайаан да күҥҥэ 15 мүнүүтэ үүртэлээн таһааран сэрээккэ оҥорторор этэ. Сүрдээх үчүгэй үгэс буолбута, кэлин бэйэбит эмиэ наар сэрээккэлиир идэлэммиппит.
Оннооҕор 90-с сыллардаахха улахан ыһыллыы кэмигэр санаабытын түһэрбэккэ үлэлээбиппит. Ардыгар хамнас кэлбэт буолбутугар кинигэлэрбитин сүгэ сылдьан атыылаан килиэп харчыта булунар этибит. Бородууксуйалаах буолан ыарахан кэмнэри арыычча чэпчэкитик аһарбыппыт дии саныыбын.
Биир кэмҥэ сылгы, сүөһу ииттэн идэһэ бөҕө сиэбиппит. Аны үлэһит бөҕө тэрилтэбит көмөтүнэн квартира, дьиэ-уот ылбыттара. Онон үлэһиттэргэ улахан болҕомто, кыһамньы мэлдьи баара, баар даҕаны. «Бичикпин» күн бүгүҥҥэ диэри иккис дьиэ кэргэним курдук саныыбын. Кэлэктииппэр, тэрилтэбэр мэлдьи махтанабын, куруук саныыбын, ахтабын.

Билиҥҥи «Айар» кэлэктиибигэр ситиһиилэри баҕарабын! Август Васильевыһы биһигини умнубатыгар махтанабын, алгыспын тиэрдэбин!



Александра Николаевна Кардашевская-Харыстаана биһиги  тэрилтэбитигэр сэттэ сыл корректорынан үлэлээбитэ.  РФ суруналыыстарын, СӨ суруйааччыларын чилиэнэ, Мэҥэ Хаҥалас улууһун Холгума нэһилиэгин бочуоттаах олохтооҕо, СӨ култууратын туйгуна. 
Кини биһиги кыһабытыгар үлэлээбит сылларын бу курдук ахтар:
Мин «Бичиккэ» 1992 сыллаахха «Чолбон» сурунаалтан көһөн кэлбитим. Сурунаалга үлэлиир эрдэхпинэ кэлиэгэм  Соловьев Семен бэчээт үлэтигэр уөрэппитэ-такайбыта. Онтон тирэхтэнэн кинигэ кыһатыгар көспүтүм.
Биһиги кэлэктииппитигэр култуурнай-маасабай тэрээһин бөҕө ыытар этибит, мин оннук тэрээһиҥҥэ бастакы уочарат буоларым. Оскуолаҕа сылдьан хомсомуол лидерэ буоламмын иилиир-саҕалыыр үлэҕэ үлүһүйэн туран кыттарым. Саҥа дьылга көр-оонньуу бөҕө буолара, маскараат диэн, салааларынан көрдөөх нүөмэрдэр  диэн. Мин цыганскай үнкүүнү кыайа тутар этим. Сынньалаҥ таһынан субуотунньук бөҕө буолара. Онно кэргэммин Эрчимэни ыытарым. Кэлиэгэлэрим хата үөрэллэрэ, эр киһи кыайара элбэх буоллаҕа. 
Оннук туруулаах үлэни, көрдөөх сынньалаҥы дьүөрэлээн эйэ дэмнээхтик сылдьыбыппыт. 
Кыһабар үлэлии сылдьан 3 кинигэбин таһааттарбытым. Кэлэктиибим өйөөн, өйдөөн,  суруйааччы  буоларбар куорсун анньыбыта диэххэ сөп. Онон махталым муҥура суох. 
Билигин да мин “Айар” кыһа үлэтин сэргээн ааҕабын, көрөбүн-истэбин, хайгыыбын, биһириибин эрэ.  Үрдүктэн үрдүк чыпчаалга өссө тахса туруҥ. Барыгытыгар кытаанах доруобуйаны баҕарабын!