Сахалыы тыллаах оҕо уһуйааннарын иитээччилэригэр, төрөппүттэргэ, оҕону сайыннарар кииннэр педагогтарыгар "Саха уһуйаана" систиэмэнэн "Кустук" оскуола иннинээҕи үөрэхтээһин бырагырааматыгар олоҕуран, уопуттаах методист педагог Екатерина Николаевна Кириллина "Түннүк" көмө босуобуйата эбиилээх хос саҥардыллан таҕыста. Бу сахалыы тылынан ахсаан маҥнайгы өйдөбүллэрин уонна мындыр өйү сайыннарар босуобуйа аан бастаан 1996 сыллаахха бэчээттэммитэ. Бу босуобуйаны иитээччи эрэ буолбакка уһуйаан оҕотун дьарыктыыр киһи ким баҕарар туһаныан сөп. Ол курдук манна уопсай тылынан, аҥаардас теориянан эрэ буолбакка, хайдах үөрэтэри ымпыгар-чымпыгар диэри быһаарыы, практическай дьарыктар бэриллэллэр.
Эрэдээксийэлиир хамыыһыйаҕа үлэлээтилэр: С.Ф. Гоголев аатынан Дьокуускайдааҕы педагогическай колледж оскуола иннинээҕи үөрэхтээһин салаатын преподавателлэрэ А.Н. Федорова, А.А. Скрябина, Т.И. Никифорова. Сыанабылы Дьокуускай к. 23 нүөмэрдээх "Цветик-семицветик" оҕо уһуйаанын педагог психолога Л.Д. Троева-Лугинова суруйда.