Саха уһуйаана. Саха төрүт дьарыга

«Саха уһуйаана» сиэрийэнэн 5-с биллэрэр-көрдөрөр карточка таҕыста! Тиэмэтин мээнэҕэ талбатыбыт. Хомойуох иһин, билиҥҥи оҕолорго өбүгэбит атын омуктартан ураты олоҕун-дьаһаҕын туһунан кэпсиир, өйдөтөр олус уустук буолла. Күн-дьыл аастаҕын аайы, сайдыыны баттаһа, сахалыы эйгэни кытта алтыһарбыт аччаата. Бу кыһалҕаны туоратаары, төрөппүттэргэ, иитээччилэргэ көмөлөһөн, Амма улууһун «Хатыҥчаана» уһуйаан иитээччилэрэ биллэрэр-көрдөрөр карточкалары оҥордулар. Манна оҕо ситимнээх саҥатын сайыннарар тэттик тиэкистэр, хоһооннор, өс хоһоонноро, таабырыннар, ыйытыктар, уустук өйдөбүллээх тылларга тылдьыт баар. Кырдьык, өбүгэбит олоҕун-дьаһаҕын, тэринэн олорбут үтүө үгэстэрин, сүрүн дьарыктарын, астарын-үөллэрин, таҥнар таҥастарын, оонньууларын, үлэтин-хамнаһын, норуот айымньытын туһунан ийэ-аҕа, уһуйаан, оскуола эрэ иҥэрдэҕинэ кэнчээри ыччаппыт омук быһыытынан уратытытын билинэ улаатыаҕа, киэҥ сирдэринэн эрэллээхтик тэлэһийиэҕэ, төрөөбүт төрүт тылын сүөгэйин-сүмэтин иҥэринэн улаатыаҕа. Ону оҕоҕо оонньуу, сэһэргэһии ньыматынан билиһиннэрдэххэ быдан тиийимтиэ, судургу буолар.