Саха ыалын халандаара 2023

Киһи аймах биирдэ таптаабытыттан, оннооҕор кылгас да кэмҥэ уйаҕастык убаммытыттан кэбэҕэстик арахсара олус уустук, куруук курутуйуулаах, ол онтон тэйдэҕинэ даҕаны бэрт ыарыылаахтык ахтар айылгылаах. Ити киһи ис иэйиитигэр сыһыаннаах. Саха киһитэ уруккуттан үөрүйэх оҥостубут сыллааҕы халандаарын куруук күүтэр, атыыга таҕыстар эрэ соҕотохто күлүм гыннаран атыылаһар. Ол аата кини урукку тапталлаах дьарыгыттан араҕар санаата суоҕун, биһиги кэпсиир сонуммутун сэҥээрэрин сыллата биһирии бэлиэтиибит.
Оттон бу сырыыга, илиискэ суруллубутун ааҕа-ааҕа, быһыта тыытан быраҕыллан иһэр оҥоһуулаах халандаарбытыгар кэрэхсэбиллээх буолаарай диэн, куолубутунан, эгэлгэ сонуну мунньа сатаатыбыт. Күнү-дьылы кэтээччилэргэ, ыйы-сылы сылыктааччыларга анаан наука сэрэтэн этэр, ыйааһыннаах ыйыыларын сэргэ күннэтэ сэргэхсийэ таарыйа ааҕарга анаан тэттик суруйуулары киллэрдибит. Оҕоҕо да, оҕонньорго да туһалаах, туһааннаах буоллун диэн дьоҕус кэпсээннэри, күлүүлээх түгэннэри түмтүбүт. Өйү эрчийэри, мэйиини үлэлэтэри сөбүлүүр араҥаҕа аан дойдуну анаарар биктэриинэлэри, оҕуруктаах ыйытыктары уктубут. Быыһыгар аста астааҥ, күннээҕи түбүккэ көмөлөһүннэриҥ диэн сүбэлэрдээхпит.
Онон, саҥа үүнээри турар 2023 сылынан истиҥ эҕэрдэбитин кытта быйылгы дьыллааҕы халандаары утары уунабыт!
Үүнүөхтээх сыл бэлиэ күнүн хроникатын СӨ Национальнай бибилэтиэкэтин библиограба И.И. Татаринов бэлэмнээтэ.
Дьиэ кэргэҥҥэ барыта этэҥҥэ эрэ буоллун, ситиһии, үөрүү-көтүү киирэ турдун диэн алгыыбыт!